НАМОЯНДАГОНИ ҲАЙАТИ ТОҶИКИСТОН БО ДЕПАРТАМЕНТИ КАФОЛАТҲОИ АБНА (МАГАТЭ) МУЛОҚОТ НАМУДАНД
Дар Вена, дар доираи ҷаласаи 70-уми АБНА, намояндагони Ҷумҳурии Тоҷикистон бо Департаменти кафолатҳои АБНА мулоқот доштанд. Муҳокимаҳо ҳадафи татбиқи кафолатҳои атомӣ, пешниҳоди саривақти ҳисобот ва такмили низоми миллии назорати маводи ядроӣ доштанд. Ҷонибҳо ба таҳкими иқтидори институтионалӣ, баланд бардоштани тахассуси мутахассисон ва иҷрои уҳдадориҳои байналмилалӣ дар соҳаи амнияти ядроӣ таваҷҷуҳи махсус доданд.
Дар доираи иштироки ҳайати расмии Ҷумҳурии Тоҷикистон дар кори иҷлосияи 70-уми Конфронси генералии Агентии байналмилалии неруи атомӣ (АБНА) дар Маркази байналмилалии Вена мулоқоти кории намояндагони Ҷумҳурии Тоҷикистон бо намояндагони Департаменти кафолатҳои АБНА баргузор гардид.
Ҷумҳурии Тоҷикистонро дар мулоқоти мазкур муовини Вазири саноат ва технологияҳои нави Ҷумҳурии Тоҷикистон Азиз Назар ва директори Агентии амнияти химиявӣ, биологӣ, радиатсионӣ ва ядроии Академияи миллии илмҳои Тоҷикистон Илҳом Мирсаидзода намояндагӣ намуданд.
Дар ҷараёни мулоқот ҷонибҳо вазъи кунунии ҳамкории Ҷумҳурии Тоҷикистон бо АБНА (МАГАТЭ) дар самти татбиқи кафолатҳо, масъалаҳои сари вақт, пурра ва ба таври дахлдор пешниҳод намудани ҳисобот ва маълумоти зарурӣ ба Агентӣ, инчунин тадбирҳои минбаъда ҷиҳати такмили низоми миллии баҳисобгирӣ ва назорати маводи ядроиро баррасӣ намуданд.
Таваҷҷуҳи махсус ба масъалаҳои таҳкими минбаъдаи механизмҳои кории ҳамкорӣ миёни мақомоти ваколатдори Ҷумҳурии Тоҷикистон ва Департаменти кафолатҳои АБНА (МАГАТЭ), мубодилаи саривақтии иттилоот ва иҷрои уҳдадориҳои дахлдори кишвар дар доираи санадҳо ва созишномаҳои амалкунандаи байналмилалӣ зоҳир гардид.
Ҷонибҳо аҳаммияти идомаи муколамаи мунтазами касбӣ ва таъмини саривақтӣ, пуррагӣ ва сифати маълумоти пешниҳодшавандаро таъкид намуданд. Қайд гардид, ки татбиқи самараноки низоми кафолатҳои АБНА (МАГАТЭ), аз ҷумла, ба пешниҳоди саривақтии ҳисобот ва эъломияҳои дақиқу мукаммал аз ҷониби давлатҳо ва ҳамкории зичи Агентӣ бо мақомоти миллии дахлдор такя менамояд.
Намояндагони Ҷумҳурии Тоҷикистон пойбандии кишварро ба иҷрои уҳдадориҳои байналмилалии худ дар соҳаи пешгирии паҳншавии силоҳи ядроӣ ва истифодаи технологияҳои ядроӣ танҳо бо ҳадафҳои осоишта тасдиқ намуданд.
Дар рафти музокирот ҷониби Тоҷикистон инчунин ҳавасмандии худро ба рушди минбаъдаи ҳамкории амалӣ бо АБНА (МАГАТЭ) дар соҳаи кафолатҳо изҳор намуда, масъалаҳои баланд бардоштани тахассуси мутахассисони миллӣ, такмили тартиби омода ва пешниҳод намудани ҳисобот, таҳкими низоми давлатии баҳисобгирӣ ва назорати маводи ядроӣ, инчунин мубодилаи таҷриба ва ҷорӣ намудани усул ва воситаҳои муосири МАГАТЭ-ро муҳим арзёбӣ намуд.
Таваҷҷуҳи алоҳида ба масъалаҳои таҳкими иқтидори институтсионалӣ ва кадрии Ҷумҳурии Тоҷикистон дар ин самт зоҳир гардид. Ҷонибҳо омодагии худро барои идомаи машваратҳо ва ҳамкории муштарак оид ба масъалаҳои мавриди таваҷҷуҳи тарафайн иброз доштанд.
Зикр гардид, ки ҳамкории созандаи Ҷумҳурии Тоҷикистон бо АБНА (МАГАТЭ) дар соҳаи кафолатҳо яке аз ҷузъҳои муҳими сиёсати умумии давлатӣ ба шумор рафта, ба таъмини амнияти ядроӣ ва радиатсионӣ, иҷрои уҳдадориҳои байналмилалӣ дар соҳаи пешгирии паҳншавии силоҳи ядроӣ ва рушди минбаъдаи истифодаи осоиштаи илму технологияҳои ядроӣ равона шудааст.
Дар анҷоми мулоқот ҷонибҳо нияти худро ҷиҳати идомаи ҳамкории боз, созанда ва ба натиҷаҳои амалӣ нигаронидашуда, ки ба такмили минбаъдаи татбиқи кафолатҳои АБНА (МАГАТЭ) дар Ҷумҳурии Тоҷикистон ва таҳкими ҳамкории дарозмуддат бо Агентӣ мусоидат менамояд, изҳор намуданд.
Фотогалерея
